اخبار Alex القاهرة اليوم
مقالات مشابهة
أخبار الشرق الأوسط _
عصر التربيه والترميم . . واضح ان شغل الواحد فى مجال ( البناء والتعمير ) خلي ثقافته الكلامية تطفي علي وصفه للأحداث .. حاسة اني عامله زي شخصيه اطاطا الست الكبيره اللي مركزه مع كل السلبيات المستحدثه في حياتنا وحطاها في بؤره الضوء .. وعايزه تتعايش معاها بس مش عارفة او فعلاً مش قادره . .!
ايه اللي حصل للعيال الصغيره او بالأصح ايه اللي حصل للامهات والاباء ..؟!
من ردود افعال باردة وسمجة ضد تصرف اولادهم امام الناس في بلاهة منقطعة النظير والأسوء من ذلك هو (( التشجيع والترحيب )) علي استمرار رخامة ورزالة وبواخة العيل بدون اي احراج من الاهل وعدم توجيه الطفل فالحظة والتو .. او حتي فيما بعد .أتذكر في طفولتي اني لايمكن اقاطع امي ابداً .. فالكلام امام الناس لا اجرؤ ان امسك قرقوشة ودنها مثل ” عبدالمنعم ابراهيم ” فى فيلم إسماعيل ياسين فى مستشفى المجانيين ، لما كان مجنون وطلع من ورا المكتب بلا بنطلون . . وافضل اتكلم في طبلة ودن امي طول الوقت امام الجميع . . لم اكن استطيع فتح التليفزيون الا ايام الخميس والجمعة فقط في ظل ان كل طفل ماسك تليفونه (( ابو تلاتين تلاف جنيه )) يلعب مع حاجات وهمية بالساعات ، ويفقد الحركه والنطق والحياة امام هذه الشاشة المدمره . !
وتقدر اي ام تروح نادي او تحفظهم قران او تعلمهم موسيقي او يلعبوا كوره او سباحه او حتي بلي ..!
احسن من هذا الاستسلام والتنفيض للعيال علشان ينزلوا من علي قفاها علشان هي تتفرغ لمراقبة الزوج او الجيران او السليفات ، او الصديقات ، او حتي الخدامات .!
في ظل امي كانت تدفعني في اقصي الصعيد ان اذاكر الشعر واتعلم الاكورديون وتشتري لي اورج . اه والله امي جابتلي اورج . وتجهز لي ملابس اذهب بها لقصر الثقافه وملابس اخري لمركز الشباب وجلبيه جميلة (( للكُتاب )) عند الشيخ حمدان . . وتشتري لي غويشه وخاتم وتوعدني ان لما نروح مصر فالاجازه هاشتري كل ملابس العام حتي ابدو انيقة ولطيفة . . . لا أتذكر يوماً اني دخلت بيتنا واندفعت افتش في بيت الناس في كل مكان وكأني استعمار داخل علي مكان .. !
لا اتصور اني افتح تلاجة ناس احنا بنزورهم دي جريمه كاملة من وجه نظر الطبيعة ..!
كيف اكشف سر وستر هذا البيت وافتح التلاجه .. ؟!
كيف اتنطط زي القرد علي المقاعد كيف الهث زي الكلب اشمشم فالبيت كله وامي قاعده تتفرج عليا وتبتسم وتقول اصله شقي . .!
ايه البواخه دي . .؟!
كيف اكون عازمة ناس .. والعيال تقعد معانا علي نفس الطعام مع الضيوف .؟!
ويمكن قبلهم وكمان أقعد اسأل العيل واقوله :
تاكل ايه ياحبيي واتحايل عليه قدام الناس والعيل قالب بوزه زي زلومة الفيل .. ومش عايز يرد لأن الاكل مش عاجبه . . انشاله ما طفح هو واللي مربينه . .!
معقول يكون عندي طفل غير راضي طول الوقت . .؟!!
معقول علي طول مبوز وانا طول العمر اصالح فيه . .؟!
في حاج’ مش مفهوم’ بالنسبه لي ..!
ده يعني حنان مثلاً ولا تمثيل شياكة ولا تحضر مبالغ فيه . ده حتي حنان مطاوع براخمتها اخف من اللي بيحصل ده والله . !
حتي لما كنا بنعيا ونسخن شوية .. بكتير شوية خل وكمادات واقصي طموحتنا لبوسه والله .!
اما ثقافة ارتياد المستشفيات دي لم نكن نسمع عنها الا قبل وفاه الشخص بيومين .. والله قعد يومين فالمستشفي ومات وربنا ماطولش عليه .. !
لكن لو عيل حواجبه بتنقح عليه يقعد فالمستشفي في حدود يومين بألفين وكده يبقي العيل محسود ومنظور ولسه خارج من المستشفي ويمكن فالنقاهة ومحتاج يروح العزبة يغير جو .!
ولا المدارس والدروس دول محتاجين اكون فاضية اسبوع اتكلم عنهم ..!
واحنا كانت مدرسة واحدة بس بنحبها ونحب نصحي الصبح نروحها .. ولا نرجع نبكي ونشتكي كل يوم من حاجة ، ولا عمر امي راحت مدرستي ابداً .. بس كانت تسأل مدرستي من بعيد لبعيد .. علشان مااحسش بالجبروت وان امي هاتيجي تكسر المدرسة عليكم .. وكنت انا طول الوقت خايفة من اي شكوي مع اني كنت بعمل كل يوم بلوي .!
بس كان دمي خفيف .. ومش عيل سخيف .. علشان كده كانوا بيستحملوني وكمان تقريباً كانوا بيحبوني .!
انا مشفقه علي الاطفال من جو غير صحي ومن تربية محتاجة ترميم لانها كلها شروخ ومصدعة ومتصدعة .. ومش ممكن اغاني المهرجانات .. وتصوير الفيديوهات هو ده اللي ممكن العيل يعيني يحبه ويتعلمه .!
لازم يكون في حل وسط بين القديم والجديد والعيل مسكين متلقي فقط وعامل زي الاناء ياتملاه ميه بسكر ياتحط فيه مية نار .!
والنبي خلي النص ساعه اللي الناس بتزورك فيها او انت بتزور فيها ناس تبقى هي مقياس تحضرك وثقافتك واستحمال الاخر ليك . . في ظل ان في عيال ايه ولسه فاضل فيهم وفي اللي خلفوهم حيا والناس بتدعيلهم وتنتظر شوفتهم وزياريتهم .!
بلاش الكلمتين اللي مابتسمعهموش يخلوك عامل نفسك من بنها . مع الأعتذار لناس بنها . . لو مش قادر تسيطر وتربي الزم بيتك لحد ابنك الرخم مايكبر .. بس مش هايكون عنده زينا ذكريات ولا حكايات ولا امه جابتله اورج ولا علمته كوروشيه ولا راح رحله ولا اتعلم كلمه وقال حكمه . !
هايطلع عيل ماسخ وقالب بوزه عالاخر وانت فاكر نفسك نجحت وفلحت وارتحت .!
مش ملاحظين اني ماجبتش سيرة ابويا فى الموضوع . اصل ابويا لو كان دخل في المساخه ماكنتش هنا لا كنت ولا هاكون ولو حتي كنت عملت فيها عيل مجنون . . الاب ده لازم يكون قامة لاتوصل له حكايات ومهاترات ولا افتكاسات ولا اكروبات . . ده بس يبص من بعيد علشان انت تفضل سعيد .. لكن غير كده يبقي اسمه (( بابا نويل )) ولازم ابنه يطلع عويل.!
