أخبار عاجلة
الرئيسية / اكتوبر اليوم / المستشارة عبير عصام رفعت تكتب : خلى حياتك ندية فى الحبكة الدرامية .. وست بلا ود عمرها ماهاتكون ند .!

المستشارة عبير عصام رفعت تكتب : خلى حياتك ندية فى الحبكة الدرامية .. وست بلا ود عمرها ماهاتكون ند .!

 

أخبار الشرق الأوسط _

 

كالعادة يخرج من البيت الساعه ١٠ صباحاً ..  واغلب الاوقات يعود  بعد ١٢ ساعه .!

ايه اللي عملتوا الستات ده في نفسها . .؟!

ايه الحريه في ارتدائك ملابسك كامل’ ..  ومعاهم كمان كورسية  علشان ينقص من وزنك حوالي ٣ كيلو .. !

وصندل مقرطم صوابعك وعاملك كالو عليه لزقة  صغيرة  من الصيدلية ..  او جزمة من ام بوز رفيع زي اللي كان مولع بيها فؤاد المهندس في احد افلامه الجميله . . او إيشارب كاتم علي مراوح مخك اولا  .. وعلي ودانك وقارض علي قصبتك الهوائية ومراوحها  ومتجبسة  بعدة دبابيس الوان لزوم الشياكة  والالجة  والابهة  . !

علي اساس ان الناس واخدة بالها من لون راس الدبوس . !

ولو الأخت منقبة ..  معني كده انها فقط تحصل علي حريتها عند اغلاق باب بيتها عليها . .!

حتي صديقاتي المسيحيات التي تتسمن بالاناقه عاملين حساب الجيب فالقعدة ولو حاجة  وقعت علي الارض هايفكروا الف مره قبل التقاطها ..!

ده بالنسبة ”  للحبكة  الدرامية ”  للملابس والصنادل والاحذي’ ذات الكعوب الفارهة  التي وظيفتها الاساسية  التقوس السريع في فقرات القدم  .. والتشوه الاكيد في الصوابع الذي قد يؤدي في بعض الحالات للروماتيويد . !

ده العذاب المعنوي  بعينه . .!

ندخل علي الجهد العضلي والبدني الذي تمارسه (  المرأة  )  طول اليوم من أول القفز من علي السرير وعمل الأكل قبل ماتنزل  .. وترتيب البيت والغيط لو وجد  ..!

والجري للأ لحاق بمواصلة ..  او قيادة سيارتها التي قد تكون إحدي عجالاتها نايمة ،  والاستعانة  بالماره لانقاذها قبل شطب اليوم عليها ..  وفى العمل تفرك وتحرك ..  وتلف وتدور ..  وتناهد ..  وتصرخ  .. وتشرشح  .. وتجري ترجع البيت مدغدغة ومفخفخة ومنفخة ..!

ولاتملك حتي رفاهية  الجدال وترمي نفسها علي أقرب كنبة  ورا باب الشقة ..  وقبل ماتقلع الجزمة   تبص علي كوم المواعين المتكومين ..  وعيالها اللي اترموا نايمين ملكومين  .. ولا في كلمة حلوه ولا نظرة سمحة  من ام محسوبة  علي الشقيانين . .!

خلصنا من ده كله . .؟!!!!

دخلنا علي النفسي .  . وده مالوش حل غير الانتحار . .!!!

العقاب النفسي ..  والاكتئاب الحاد  ..!

وقد لايزول الا بزوال السبب ..  وممكن يكون مديرك ولا زميلتك ولا حتي سواقك او حد مجبره علي التعامل معاه ماهو ده الشغل  .. مش العزبة اللي سابها الوالد تقدري تتخلصي من الجانيني ولا الكلاف ولا حتي السفرجي .

انت مجبورة  بعد ماكنتي مستورة . !

.استحملي كل المرضي اللي مطلوقين عليكي ماهما ذيك عندهم من اول الايشارب للصندل واحتمال الحنجل والمنجل . . كلكم في الهوا سوا .!

عايزة  تحققي ذاتك وتقبضي علاوتك وتترقي في درجاتك . ؟!

اعملي كل ده بس لا تدوري علي رحمة ..  ولا حنية ..  ولا تطلبي العيدية  ولا حد يغيرلك كاوتش العربية .. !

وخلي كل حياتك ندية  . .

وراسك براسه ومرمطيه والمرتب خبيه واعملى جمعيه وخلي بالك انتي بعتي القضية  والدنيا حواليكي بتنهار وعاملة  فيها شمشون الجبار . .!

طب اعملي فيها عبلة ..  ولا هبلة .. ومش لازم تبقي ب ١٠٠ راجل خليك بعشر ستات وادخلي حطي علي شعرك شويه برفنات وحبه كريمات ..  كل ساعة  بره بيتك  .. بتخرب بيتك  .!

وانا أول المتضررين والمضرورين بس لو رجع الزمان هالزم مكاني ..  واحترم واعيش في كنف  .. وهايكون عندي هدف واعمل حاجة  علي قد مجهودي و هااعمل سقف لطموحي ..  وهااخرج اتمشي واتعشي ..  و افك شعري واريح رجلي واطفي مخي واتفرج علي تمثيلية  واعمل ملوخية  .

عملنا في نفسنا مهذلة  وبهدلة  وعندنا كل حاجة  واضحة  ومنزله ..

والكتاب موجود ..

فيه كل الحدود  ..!

بس بني ادم جحود ..!

وبيفكر ازاي يسود ..

مع ان مخه محدود .!

وست بلا ود  .. عمرها ماهاتكون ند ..!

عن Alex

شاهد أيضاً

هبة عادل تكتب : فضل الأستغفار فى حياة الشطار .!

أخبار الشرق الأوسط _ الإستغفار عامل زي الحبوب المُنشطة زي مشروب الطاقه .. شحنة كهربائية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*