أخبار عاجلة
الرئيسية / مقالات أحمد بكر سليم / أحمد بكر سليم يكتب : فى عصر شركة ( فينوس ) إقالة وزير الكهرباء رحمة من السيسى .!

أحمد بكر سليم يكتب : فى عصر شركة ( فينوس ) إقالة وزير الكهرباء رحمة من السيسى .!

والله الواحد بيستغرب على المسؤل اللى بيهد فى جدران الرئيس  عبد الفتاح السيسى .. والواحد ما بيصدق نتقدم خطوة لقدام نلقى المسؤل فى مصر بيرجعنا عشرة لورا .. خليك يا عم بعيد دا السيسى لسة  ف تانى عيد ..!

الناس طافحة الكوتة من الغلاء واستعباط بعد الفاسدين على الغلابة .. شوية وحانرفع شعار :

غلى الكهرباء وغلى الغرامات .. لحد مابعنا عفش البيت .. !

ويأتى السيد المبجل وزير الكهرباء المصرى لا شغلة ليه الا مضاعفة سعر استهلاك الكهرباء .. ده حق الدولة عشان بتجدد الشبكات وغيره وبتركب مولدات عملاقة ، حتى غيرت المنظومة للأحسن ده معروف وفهمناه ولمسناه  .. وكمان السد العالى بخير شوية فى خضم ازمة مياة ( أثيوبيا ) اللى حلها اسهل من شك الدبوس .. لو خرج نائب فى البرلمان المصرى وبرفع يده ويطلب الكلمة وتكون نارية كشواظ من نار فى وجه رئيس الوزراء الأثيوبى الأرعن العميل لتل ابيب .. ويقف النائب يحبوه العزة والكرامة والغير على مصر ويقول ( نأسف ايها السادة إن البرلمان المصرى لم يوافق على اتفاقية سد النهضة ولم تعرض عليه أصلاً ) وانتهى الدرس يا غبى والعبى بقى يا اثوبيا انت نسوانك دور تانى ..!

القصد : مصر انتجت من الكهرباء مايزيد ويفيض .. وخلصنا وكلفنا وصرفنا .. ومصينا دم الناس بكيفها والناس لم تعترض لأنها ايقنت ان تطوير منظومة الكهرباء يخدمها ، وفى مصلحة الوطن  ..!

لكن ماتفعلة شرطة الكهرباء اثناء المهاجمات الشرسة على المبانى والعمارات والبيوت يفتح الباب إلى السؤال .. هو مافيش الا الغلابة .. ؟!

غرامات وسجن وغيره عشان لمبة منورة فى بيت فقير مافهوش سقف .. لمبة عشان الواد او البنت تذاكر عليها وتفرح امها اللى كليتها باعتها عشان تصرف على عيالها بعد ماطفش راجلها ورمى إيده وخلع هرباً من تحمل المسؤلية الأسرية .!

بينما سيارات ( فينوس ) تحتل ميادين وشوارع مصر  24 ساعة وبدون فواصل ولا إعلانات العروض مستمرة فى الشارع وعلى مظم المحطات الفضائية الهلس .. ليل  و نهار ..الاف من السيارت تسرق الكهرباء وقال فى النهاية بتدفع ممارسة  كل شهر ملاليم .. !

بينما الفقير اللى موصل سلك على اوضة معدومة يتغرم بالالاف .. والاف الغرامات ينتظر دخولها المحاكم وإرهاق القضاة واستغلال المحاكم فى التنكيل بالمواطن الفقير اللى عداده اتسرق من تحت العبارة وباعه الحرامى الجعان  خردة .. او معهوش تمن عداد من الأصل ..!

الرحمة حلوة يا وزير الكهرباء خف على الغلابة التى تئن من حضرتك ومن مباحث الكهرباء فى كل محافظات مصر من اسكندرية لأسوان واغلب السادة الظباط مركبين وش خشب ولا تنفذ روح القانون  .. وده بيفتح الطريق لهدم مايبنيه الرئيس ( عبد الفتاح السيسى ) من جدران الثقة والمحبة بينه وبين الشعب .!

عن Alex

شاهد أيضاً

أحمد بكر سليم يكتب : ” مجدى عيد ” الممثل الذى يحمل فى حنجرته الف فنان .!

أخبار الشرق الأوسط _ الفنان ” مجدى عيد ” تجاوز مرحلة المونولوجست فأصبح الفنان الخارق …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*